Timor-Leste hanesan nasaun ida ne’ebe foin harii iha tinan 4 nia laran. Nasaun ida ne’e hanesan nasaun demokrasia ida ne’ebe foun liu, no hau sente kontente hodi sai nudar Primeiru Ministru ba nasaun ida ne’e.

Alende servisu Governu nian tenke la’o ba oin nafatin, iha mos kistaun ida ne’ebe persiza hau no ema hotu iha ita nia nasaun ne’e tenke hare ba, no buat ne’e mak oinsa hodi buka dame no seguransa ne’ebe sei la kotu iha futuru ba nasaun ida ne’e.

Wainhira la iha dame, ita nia nasaun sei labele halo mudansa ba oin. Ita nia oan sira sei labele hetan edukasaun ho di’ak no sira labele sai bo’ot hodi harii rasik sira nia familia no uma kain. Moras no mukit sei labele rezolve. Ita sei labele toba ho seguru no harii ita nia moris.

Hau nia laran moras tamba joventude sira lakon sira nia vida. Depois de rezistensia ba tempu ne’ebe naruk hodi hetan ita nia independensia, agora tempu to’o ona hodi hapara funu. Agora tempu to’o ona ba dezlokadu sira hodi fila hikas ba sira nia komunidade. Agora tempu to’o ona hodi ajuda dezlokadus sira hodi harii hikas sira nia uma no sira nia moris.

Dame no seguransa iha Timor-Leste sai hanesan hau nia priodidade permeiru no bo’ot liu.

Wainhira ita aprende ona hodi moris hamutuk no hadomi ita nia vijinhos sira, ita bele konsentra ona hodi harii hikas ita nia nasaun furak ida ne’e.

Hau iha mehi ida hodi harii rede estrada nian iha Timor-Leste tomak, sistema foun kona-ba elektresidade no seanamentu, sistema furak ida kona-ba indústria iha area turismo nian, projetu espesial hodi redus mukit no moras. Projetu-projetu ambisiozu hirak ne’e bele kria moris ne’ebe di’ak liu tan no kria mos servisu foun rihun ba rihun iha ita nia rain.

Ida ne’e hanesan esperansa ida ne’ebe bo’ot tebe-tebes, maibe ita tenke hahu iha fatin ruma, no hahu ho sentidu konfiansa no enerjia.

Hau reza katak hau nia maluk sidadaun sira mos iha mehi ne’ebe hanesan no hanoin no hakarak ne’ebe hanesan hodi kria dame.