|
Primeiru-Ministru asiste asinatura akordu hó Austrália,
9 fulan Janeiru tinan 2006
Primeiru-Ministru, Marí Alkatiri hamutuk hó xefe
governu australianu John Howard, iha loron 12, kinta-feira, asisti
asinatura akordu entre Timor-Leste no Austrália, kona-bá
esplorasaun iha Tasi Timor.
Tuir akordu kona-bá fahe esplorasaun rekursus minarai
nian iha Tasi Timor, liuliu kona-bá kampu Greater Sunrise
nian - ne'ebé sei asina husi ministru Negósius Estranjeirus
nasaun rua nian Timor-Leste no Austrália, José Ramos
Horta no Alexander Downer.
Hafoin fó sai tiha anúnsiu kona-bá akordu
ne'ebé iha tiha ona, iha final fulan Novembru, primeiru-ministru
deklara nu'udar pozitivu kona-bá entendimentu ne'ebé
hala'o husi nasaun rua ne'e katak "Ida ne'e hanesan akordu
ida ne'ebé diak ba Timor-Leste no mos diak ba Austrália".
Primeiru-Ministru konsidera husi akordu ida ne'e katak, bele loke
mos dalan atu " harí gazodutu ida entre Greater Sunrise
no Timor-Leste no harí lolós instalasaun refinaria
nian ida iha nasaun, hodi nune'e, bele hahú hala'o atividade
minarai nian iha rai laran".
Husi akordu ne'e, haré oinsá atu fahe hanesan rekursu
minarai nian iha kampu Greater Sunrise. Nune'e mos, iha Área
Dezenvolvimentu Konjuntu Minarai nian, Timor-Leste simu rekursu
minarai nian porsentu 90 no Austrália simu porsentu 10.
Serimónia asinatura akordu marka tiha ona ba oras tuku
15h00 lokal no (tuir oras Díli nian tuku 13h00). Husi delegasaun
timorense halo parte mos vise-ministru Rekursus Naturais, Minerais
no Polítika Enerjétika, José Teixeira, ho
Manuel de Lemos, ba Gabinete Mar de Timor.
Primeiru-Ministru sei halo viajen ba Austrália iha loron
11, kuarta-feira, oras tuku 9h00, no sei fila hikas mai Timor-Leste
iha loron 13, sesta-feira, oras tuku 16h45, iha Aeroportu Internasional
Nicolau Lobato.
|
