FILA FALI BA ÍNDISE KOMUNIKADOS IMPRENSA NIAN

Governu korije (halós fali) notisia konabá sosa kilat-musan ba Polisia Nasional Timor-Leste, 8 fulan Jullu tinan 2005

Jornal "The Australian" fo-sai notisia ida iha edisaun ohin nian, loron 7 fulan Jullu tinan 2005, konabá fornese kilat-musan ba iha Polisia Nasional Timor-Leste nian (PNTL), hanesan informasaun hirak ne'ebé falsu no presija fo esklaresimentu ruma.

Hanesan desizaun Primeiru Ministru, Mari Alkatiri nian, atu atribui ba empreza Cavalo Bravo atu fornese kilat-musan ba iha PNTL, ida ne'e la lós. Tuir sub-direktor Gregório Silva, nu'udar responsavel ba Divizaun Aprovizionamentu Ministerio do Plano e das Finanças nian (hanesan órgaun ne'ebé responsavel ba atu sosa sasan ba Governu), empreza Cavalo Bravo, iha tinan 2002, manan konkursu públiku internasional ida konabá atu fornese kilat-musan ba Força de Defesa Timor-Leste (FDTL). Iha konkursu ida ne'e, empreza lima maka tuir. Empreza Cavalo Bravo hato'o proposta ida katak kilat-musan ida folin centavo 12 dolar amerikanu ne'ebé ki'ik liu kompara ho empreza seluk ne'ebé hetan segundu lugar. Tuir regra konaba funsionamentu iha Divizaun Aprivizionamentu nian, katak bele halo fali kontratu ho empreza ida ne'ebé maka bele fo ekipamentu ho maneira ida satisfatoriu (di'ak liu), nune'e hili fali empreza ne'e hodi hola konta entrega buat sira ne'e, la'os deit ba FDTL iha tinan fiskal 2003/04, maibé mós ba PNTL, iha tinan 2004/05. Liu hosi mekanismu renovasaun kontratu nian maka Cavalo Bravo hatan ona atu iha tinan ida ne'e bele fornese ba PNTL kilat-musan rihun atus tolu (rihun 300) ne'ebé maka ho kalibre 5.65mm ho kartuxu boot no kilat-musan rihu hat nulu (rihun 40) ho kalibre hanesan iha kartuxu ki'ik ho folin kilat-musan ida centavo 37 dolar amerika, no hotu-hotu hamutuk kusta dolar 125.800. Tuir Gregório Silva, "situasaun ida hanesan hetan mos iha lei nia laran, situasaun ne'e transparente no la iha monopoliu hosi governu ida ho empreza Cavalo Bravo"

Hosi fatin seluk tuir direktor-jeral Ministerio do Plano e das Finanças nian, António Freitas, hahalok atu sosa kilat-musan ne'e "tama mós iha orsamentu" no hala'o tuir regra hirak ne'ebé maka hatur ona ba iha Orsamentu Estadu nian. Ministro Interior, Rogério Lobato, ne'ebé maka kaer PNTL, husu atu kilat-musan sira ne'e bele sosa ona, Ministerio do Plano e das Finanças fo autorizasaun no nune'e servisu sira, hodi haré katak ida ne'e tama iha orsamentu (ho valor folin as liu ida ne'ebé maka ikus mai tama iha kontratu nia laran), bok-an hala'o mekanismu sosa buat hirak tuir lei nian. Konaba ida ne'e sira husu ba iha empreza ida ne'ebé maka uluk hala'o ona servisu hirak hanesan ne'e.

Chefe Estado Maior General FDTL, brigadeiro-general Taur Matan Ruak, nega katak buat ne'ebé hakerek iha notisia ne'e la lós, katak empreza Cavalo Bravo, nu'udar empreza ne'ebé primeiro-ministro nia alin maka kaer, hetan mandato atu sosa hodi uza Estadu Timor nia naran ekipamentu militar liu-liu hanesan tanki funu, ró funu tuir Sekretário Defeza Estadu, Roque Rodrigues hateten katak, prioridade ba nasaun laós atu sosa tanki funu nian ka helikópteru: "Ladiak atu oras ne'e koalia kona bá atu sosa tanki funu nian. Daudaun ne'e presiza liu-liu atu haré oinsá buka atu hamenus kiak, hadia'a kondisaun moris veteranus Falintil, feto faluk no oan kiak sira nian…Ita la sosa armamentus (kilat funu nian) wainhira seidauk hala'o estudus nebé bele hatudu katak iha ameasas. Ita laós gastador"

Roque Rodrigues hatutan tan: " Nasaun ida ne'e hatudu ba mundu internasional katak nia ukun diak. Tanba minarai, Primeiru-Ministru lida hó osan dólar USD rihun ba rihun. Ladiak wainhira tan de'it osan dólar atus ruma, bele hafoer nia naran.

No nia tenik tan katak Kuda Fuik la reprezenta Estadu: Impreza ida ne'e la monopóliu mandatu nebé de'it husi Governu Timor. Hau hateten lolós katak lae".

Ministru Interior Rogério Lobato hateten katak, PNTL maka presiza sosa munisoens (kilat musan) atu hala'o polísia sira nia knar, wainhira forsa Seguransa Nasoens Unidas dada an hosi Timor-Leste: "Dado" "downsizing" Nasoens Unidas nian, nasaun Timor-Leste teinki okupa pozisaun ruma. Ita teinki prepara ita nia forsa husi meius nebé maka ita iha, no ita mós teinki tiru dala ruma. Hala'o treinu hó kilat, iha karreira tiru, nebé hotu-hotu sei kokok hodi fó tiru uitoan. Kilat sira teinki iha kilat musan no forsa sira teinki iha treinu beibeik hodi nune'e, bele kaer (uza) kilat hó seguransa."

Númeru hirak nebé maka hakerek iha notísia kona bá kuadru PNTL mós lalós. Daudaun ne'e elementus PNTL hamutuk 2.977 (rihun rua atus sia hitunulu resin hitu), nebé 292 (atus rua sianulu resin rua) nu'udar elementus nebé maka halo parte iha Unidade Patrullamentu Fronteira nian; elementus 217 (atus rua sanulu resin hitu) halo parte Unidade Intervensaun Rápida; elementus 82 (ualunulu resin rua) haloparte iha Unidade Rezerva Polísia nian; no elementus 152 (atus ida limanulu resin rua) halo parte iha Unidade Seguransa Pessoal. Elementus hirak ne'e hotu Nasoens Unidas maka forma hela. Kooperasaun internasional hó Polísia Timor-Leste maka'as tebes. Hanesan ezemplu, ajentes PNTL daudaun ne'e hetan treinu husi responsável polisial Autrália no Reinu Unidu nian.

Ida ne'e ba dala rua ona maka jornalista Mark Dodd fó sai notísia nebé lalós no nia merese atu hetan akuzasaun. Iha tinan 2003 atu remata, nia hateten katak Estadu timorense atu sisa kilat funu nian husi Koreia Norte. Hafoin ikus mai, hatene fali katak buat hirak nebé maka nia hateten lalós.