|
Primeiru-ministru fó sai importánsia RTTL nian
atu halo kobertura ba Timor-Leste laran tomak, 28 fulan Fevereiru
tinan 2006
Iha entrevista mensal ho RTTL kona-ba programa "Vizaun Governu"
ne'ebé fó sai iha segunda-feira, loron 27, fulan
Fevereiru, hosi Rádiu no Televizaun Timor-Leste, primeiru-ministru,
Mari Alkatiri, koalia maka'as kona-ba importánsia prokolu
nian ne'ebé Governu Timor-Leste no Protugal asina tiha
ona foin lalais ne'e atu oinsá maka bele fó sai
programasaun ka notísia hosi Radiu no Televizaun ba iha
distritu sanulu resin tolu nia laran.
Xefe Governu koalia mós katak, protokolu ne'e atu haree
oinsá maka bele fó sai programasaun ka notísia
liu hosi RTTL ho prazu tinan ida nia laran molok atu tama ba iha
kampaña 2007 nian, no importante mós atu partidu
hotu-hotu bele fó hatene sira nia mensajen" ba povu
iha distritu hotu-hotu.
Husu kona-ba prosesu eleitoral, primeiru-ministru esplika katak
tuir nia Governu, eleisaun lejislativa no prezidensiál
labele halo hamutuk deit iha loron ida atu nune'e bele fó
garantia ba estabilidade institusional. Primeiru-Ministru halo
krítika ida ba relatóriu Nasoen Unidas nian kona-ba
prosesu eleitoral ne'ebé fó sai tiha ona ba públiku
molok to'o iha Governu nia liman, no tuir lolós haruka
uluk lai ba Governu tanba Ministériu Estatal maka husu
tulun ba Nasoen Unidas atu halo avaliasaun kona-ba eleisoen",
no konsidera fahe subsídiu kampaña nian ba partidu
hotu-hotu tuir duni proporsionalidade.
Iha sétimu programa "Visão Governu",
Xefe Ezekutivu halo análize mós kona-ba protokolu
ida seluk ne'ebé Governu Timor-Leste no Portugal asina
tiha ona durante vizita Prezidente Portugal, Jorge Sampaio mai
Timor-Leste, iha semana kotuk, no protokolu ida ne'e atu haree
liu ba oinsá maka bele halo instalasaun Internet iha eskola
balu iha Timor-Leste.
Aproveita mós oportunidade ida ne'e, Primeiru-Ministru,
Marí Alkatiri halo balansu ida ne'ebé pozituvu tebes
kona-ba vizita xefe Estadu Portugal nian ne'e no nia hasai konkluzaun
katak, Prezidete Jorge Sampaio fó mensajen ida ba nia susesor
(Prezidente foun) hanesan ne'e: Timor-Leste hanesan kazu espesiál
ida ba Portugal."
Bainhira Jornalista Ana Paula Rodrigues hosi rádio no
Paulino Quintas hosi Televizaun husu kona-ba apoiu bilateral hosi
Portugal nian mai Timor-Leste maka ne'ebé tan, Primeiru-Ministru
hatan katak, ida maka apoiu ba projetu apoiu iha área justisa
nian ne'ebé PNUD maka hala'o no ba projetu ida ne'e, Estadu
Portugés fó tan ona dólar amerikanu tokon
tolu iha semana kotuk no apoiu ida seluk fali maka kona-ba ratifikasaun
hosi Timor-Leste ba konvensaun internasional tolu kona-ba meiu
ambiente: ida maka konvensaun Nasoens Unidas kona-ba luta hasoru
dezertifikasaun, ida tan kona-ba diversidade biolójika
no ida ikus kona-ba alterasaun klimatérika.
Bainhira husu kona-ba kazu indisiplina iha Forsas Armadas, Mari
Alkatiri hatan katak, bainhira nia sei lori nafatin kargu hanesan
Primeiru-Ministru maka la iha militar ida maka sai hosi forsas
Armada no ba hamutuk fali ho Polísia Nasionál Timor-Leste:
"Nia dehan bainhira nia sei sai nafatin hanesan Primeiru-Ministru
maka la iha militar ida maka sai hosi F-FDTL no tama fali iha
unidade hirak iha PNTL."
Ikus liu, primeiru-ministru koalia kona-ba vizita ofisial ne'ebé
nia sei halo iha loron 22 to'o 26 fulan Marsu iha Japaun ne'ebé
importante tebes tanba Estadu Japonés nia papel kona-ba
fó nafatin apoiu mai Timor-Leste.
Emisaun programa "Visão Governo" nian ne'e sei
repete ohin, loron 28 fulan Fevereiru, iha tuku 20h00 ka tuku
ualu kalan, iha rádiu, no iha sábadu, loron 4 fulan
Marsu, iha tuku 20h00 ka tuku ualu kalan iha televizaun.
|
