FILA FALI BA ÍNDISE KOMUNIKADOS IMPRENSA NIAN

Governu apoia kandidatura António Guterres ba kargu Nasoens Unidas nian, 12 fulan Maiu tinan 2005

Primeiru-Ministru, Marí Alkatiri, hakerek tiha ona horiseik karta ida ba sekretariu-jeral Nasoens Unidas, hodi fó deklarasaun kona ba apoiu Governu Timor-Leste nian ba kandidatura ex-xefi ezekutivu Portuges, António Guterres, ba kargu Altu Komisariu Nasoens Unidas ba Refujiadus sira nian.

"Iha mundu nebé sei iha konflitu naruk iha tinan barak nia laran no mos seluk tan mosu daudaun, maka hahú mosu ona refujiadus tokon ba tokon, no tanba tuir esperiensia nebé uluk ita nia povu hetan, maka hau labele husik hela atu hakerek surat ida ne'e", Marí esplika.

" Terus tinan 24 nia laran sei hela nafatin iha timor oan sira nia fuan laran wainhira timor oan barak maka sai refujiadus iha rai liur hanesan iha Portugal, Moçambique, Austrália, Região Administrativa Especial de Macau no iha fatin sira seluk tan iha mundu ne'e. Ami hanoin hikas fali solidariedade no preokupasaun hosi ukunain rai hirak ne'e nian nebé, iha forun internasional, sira fó nafatin razaun ba timor oan sira nebé sai refujiadus hasoru sira nia vontade rasik", Primeiru-Ministru fó sai tan.

Afirma liu tan katak rai ne'e akompaña hela ho interese tomak ba prosesu atu hili Altu Komisariu foun, maka Primeiru-Ministru hakerek: " Governu Timor nian no hau rasik fiar metin katak señor António Guterres hanesan ema ida nebé lós duni atu okupa kargu nebé importante teb-tebes ne'e".

Xefi ezekutivu ba país foun liu nebé maka tama iha Nasoens Unidas hateten katak fó apoiu ba António Guterres tanba: wainhira nia sai " Primeiru-Ministru Portugal nian iha tinan hirak liu ba, nia mós hanesan lider boot ida nebé defende determinasaun direitus povu timor nian, povu mundu seluk nian no prinsipiu universal Direitus Humanus. Nune'e mós nia iha kapasidade sirvisu nian no fó atensaun ba valor ema no moral nian ".

António Guterres hanesan naran ida hosi naran lima nebé iha lista final Sekretáriu-Jeral ONU maka selesiona ba kargu Altu Komisariu nian. Sira seluk maka : Gareth Evans(Austrália), Jessen Petersen (Dinamarca), Kamal Morjane (Tunísia), Bernard Kouchner (França).