|
Primeiru-ministru lori dolar rihun 80 fó apoiu ba foin
sáe sira iha bidau massau, 10 fulan Marsu tinan 2007
Primeiro Ministro Dr. José Ramos Horta lori ba Bidau Massau,
atu harii sentru komunidadi ida hodi haláo aktividadi formasaun
ba ema foin sae sira iha bairro nebá. Projektu née
sei gasta osan dólar rihun valu nulu, ($ 80,000.00) no
osan née oferese husi professor sira, iha Portugal.
"Luta hassoru kiak, fó meius ba foinsáe sira
atu bele eduka no dezenvolve sira nian aan, núudar sidadaun
ida nebé diak. Tamba née, hau rasik hassoru responsável
Organizasaun Sociedade Civil Portugal nian (ONG) atu hamoris projecto
née", hatete Dr. José Ramos Horta.
"Bidau Massau sei hetan kbíit atu ajuda sira nia
foin sáe, ho formasaun profissional, haláo actividade
desportu nian no hetan oportunidade buka matenek, ho computador
no Internet", afirma liu tan Xefi Governu.
"Luta hassoru kiak, prioridade governu nian no sei nafatin
hanessan motivasaun ba hau nia servisu, ba rai Timor, iha tinan
sira tuir mai", hateten tan.
Centro komunidade bairro Bidau Massau nian nebé sei haríi,
sei iha instalasaun ba curso formasaun ba tékniku profissional
- ba labarik feto no mane - sei iha Internet-Café no campo
desportu, nebé bele uza ba actividade barak. Atu haríi
deit edifísiu sei presija osan, liu dólar rihun
30 no atu halo akizisaun ba ekipamentu, sei gasta liu, osan dólar
rihun 50.
"Hau laran ksolok tamba, projecto née iha kondisaun
hotu atu ita nia foin sáe sira bele aproveita ho diak"
hatóo enginheiro Alfredo Ferreira, nuudar Presidente ONG
ho naran "Engenho e Obra" husi Portugal, nebé
hamutuk ho Primeiro-Ministro, vizita fatin atu haríi centro
comunidade née no hassoru malu ho autoridade civil no tradisional
sira nian.
"Projecto née sei haláo husi ema sira, nebé
kleur ona servisu hamutuk ho komunidade sira, iha bairro no sei
iha apoiu governu nian, atu bele realiza objectivu lolós.
Garantia ida diak liu maka ita bele iha, atu uza osan nebé
ita nia professor sira halibur, atu ajuda foin sáe timoroan
sira", hatutan tan responsável ONG née.
Protocolo projecto nian sei assina husi "Engenho e Obra"
no Associasaun Nossa Senhora Imakulada Conceição,
ho actividade iha Bairro Massau, hetan mos partisipasaun no apoiu
governu nian.
|
